אומות העולם מיט נעמען פון תנ"ך

די אחראים: אחראי, גבאי ביהמד

יידישיסט
שר חמש מאות
תגובות: 609
זיך איינגעשריבען אום: מיטוואך אוגוסט 13, 2008 10:48 pm

תגובהדורך יידישיסט » דינסטאג אוקטובער 07, 2008 4:52 am

איך האב דאס קיינמאל נישט מברר געווען, יישר-כח פאר די לינקס

יידישיסט
שר חמש מאות
תגובות: 609
זיך איינגעשריבען אום: מיטוואך אוגוסט 13, 2008 10:48 pm

תגובהדורך יידישיסט » דינסטאג אוקטובער 07, 2008 4:57 am

הרב שוועמל האט געשריבן:
יידישיסט ;
דמשק האב איך געוויסט אין אין טערקיי, נישט אין סיריע. קען זיין אמאל איז דאס געווען איינס.


אנטשולדיגט הרב שוועמל פאר'ן נישט אניאגן מיט'ן אייך געבן א תשובה, איך בין געווען פארנומען מיט תרשיש און מיט דעם סליחות אשכול.

אלזא, דמשק איז אלעמאל געווען אין סיריע (אויך אין פסוק ווערט קלאר אנגערופן סיריע אלס ארם-דמשק, וואס דאס איז דאס לאנד וואס דוד המלך האט אנעקסירט צו ארץ-ישראל און די גמרא רופט דאס אהן סוריא), און עס הייסט נאך אזוי ביז היינט-צוטאגס. איר קענט זעהן אין יעדן אטלאס אז די הויפטשטאט פון סיריע הייסט DAMESCUS (אויף אראביש דִמַשְׁק). דאכט זיך אויך אז טערקיי מיט סיריע זענען קיינמאל נישט געווען איינס (סיידן איר מיינט דאס אז זיי האבן געהאט איין הערשער, וואס דאן קענט איר דאס פאראייניגן אויך מיט א"י, דען די טערקן האבן טאקע געוועלטיגט אויף סיריע און א"י און אויף נאך פיל לענדער אין דער געגנט – באקאנט אלס די אויטאמאנישע אימפעריע - ביז צום ערשטן וועלטקריג ווען בריטאניע מיט זייערע פארגעשריטענע געווער און מאשינען האבן זיך געשטארקט איבער די טערקן מיט זייערע פארצייטישע מיליטערישע מיטלען).

יידישיסט
שר חמש מאות
תגובות: 609
זיך איינגעשריבען אום: מיטוואך אוגוסט 13, 2008 10:48 pm

תגובהדורך יידישיסט » דינסטאג אוקטובער 07, 2008 5:02 am

שוועמל שרייבט:
למעשה קומט אויס אז דייטשלאנד האט פולע נעמען; דייטשלאנד, גערמעניא, אלמעניא, אשכנז, גומר, תגרמה.


די דריי נעמען דייטשלאנד, גערמאניע, אלמאניע, זענען טאקע אנגענומענע גויאישע נעמען פאר די דייטשן ביי די דייטשע פעלקער גופא. 'גערמאניער' איז דער שם הכולל פאר די אלע בארבארישע שבטים וואס האבן אריינגעוואנדערט קיין מערב-אייראפע פאר בערך אנדערטהאלבן טויזנט יאר צוריק. די אלע שבטים זענען למעשה געווען פון איין פאלק מיט ענליכע שפראכן, וואס ווערן אלע באצייכנט אלס א טייל פון די "גערמאנישע פעלקער מיט גערמאנישע שפראכן".

איך געדענק נישט יעצט גענוי אלע נעמען פון די פארשידענע שבטים ווייל זיי זענען געווען זייער פיל: פראנקן, יוטן, אנגלען, זאקסן, לאמבארדיער, וואנדאלן, אלמאניער, א.א.וו. זיי האבן אריינגעוואנדערט קיין אייראפע פון צפון זייט און האבן איינגענומען פיל לענדער און צושאקלט פיל רעגירונגען איבערלאזנדיג פיל חורבנות אויפ'ן וועג. זעה נאר אלס ביישפיל דאס וואס דער נאמען "וואנדאל" איז פארבליבן עד היום אן אויסדרוק פאר א מענטש וואס "וואנדאליזירט" (מאכט חרוב און קערט איבער). דאס איז אויפ'ן נאמען פון איינע פון די גערמאנישע שבטים – די וואנדאלן, וואס האבן טאקע "וואנדאליזירט" וויפיל לענדער עס האט זיך געלאזט. טאקע זיי האבן ענדגילטיג איבערגענומען "קארטאגא" פון די רוימער און זיי האבן איבערגענומען די מאכט דארט, זיי האבן צושאקלט די שטארקקייט פון דעם רוימישן אימפעריע. זיי האבן אויך איינגענומען טיילן פון שפאניע, און עד היום איז נאך פארבליבן א פראווינץ אין דרום-שפאניע אויפ'ן נאמען פון די וואנדאלן וואס האבן דארט געוועלטיגט, דאס איז "אנדאלוסיא" וואס האט אריגינעל געהייסן "וואנדאלוסיא" אויפ'ן נאמען פון די וואנדאלן. אין אנדערע ווערטער, די "העפליכע דייטשן" האבן זיך שוין פיל מאל ארויסגעשטעלט אין דער היסטאריע צו זיין איינס פון די ווילדסטע פעלקער אין דער וועלט, חיות אין א מאסקע פון א מענטש (יא יא, דאס זענען די "ריינע אריער", די באקאנטע בארבארן פון דער היסטאריע).

איך האב שוין דערמאנט אויבן אין דעם אשכול (זעה איינע פון די ערשטע תגובות אין דעם צווייטן בלאט) די היסטאריע אין קורצן:
פון די אמאליגע דייטשע וואנדערענדע שבטים האבן זיך געשאפן די מדינות "דייטשלאנד, פראנקרייך, עסטרייך (אפשר אלס דעם וואס זיי זענען מזרח פון דייטשלאנד - וואס דאס מיינט בעצם "מזרח-רייך", בלויז א השערה), האללאנד, בעלגיע (וואס איז געמישט פון האללענדער מיט פראנצויזן), שווייץ (חוץ פון דעם איטאליענישן און דעם ראמאנישן חלק וואס די געהערן צו די רוימישע פעלקער), אויך די סקאנדינאווישע לענדער אין צפון, און אויך בריטאניע (ענגליש איז פון די גערמאנישע שפראכן, דערפאר ענדלט דאס אזוי צו יידיש)". אינטערעסאנט איז פארוואס די פראנצויזן האבן אדאפטירט א לאטיינישע שפראך און אפגעלאזט זייער אריגינעלע גערמאנישע שפראך.


פראנקרייך האט באקומען זייער דאזיגן נאמען וויבאלד זיי זענען געווען פון די "פראנקן" (פון די אויבנדערמאנטע שבטים), אויף דייטש מיינט בעצם פראנקרייך – די פראנקישע מלוכה (רייך טייטשט א מלוכה). האללאנד הייסט אזוי ווייל זייער לאנד איז גאר נידריג, ביז אונטערן ים-פלאך, און עס דראט זיי פיל מאל א פארפלייצונג, דערפאר הייסט דאס "נעדערלאנד" אויף זייער שפראך משורש "נידריג", און דאס מיינט אויך "האללאנד" אויף דייטש (אויך אויף לה"ק רופט מען דאס "ארץ השפלה"). שווייץ האט באקומען זייער נאמען נאכדעם וואס עס האט זיך געשאפן דער פאראייניגונג פון עטליכע קאנטאנען צוזאמען וואס האבן געשאפן די שווייצער בונד, וויבאלד דער פאראייניגונג - א שטייגער ווי דעם פאראייניגונג פון די "פאראייניגטע שטאטן" – איז אונטערגעשריבן געווארן אין דעם קאנטאן שוויץ (SCHWYZ), דערפאר איז אנגערופן געווארן דאס לאנד שווייץ (נאכדעם וואס אין דער פארגאנגענהייט האט עס געהייסן "העלוועציא", איך ווייס נישט דעם מקור).

אלמאניע – איז דער נאמען מיט וואס די פראנצויזן רופן אן "גערמאניע", אויך אויף אראביש רופט מען עס אזוי, און מן-הסתם אין נאך שפראכן. דאס שטאמט ווי פארשטענדליך פון דעם שבט פון די אלמאניער וואס האבן אזוי גערופן זייער שפראך, און ביי טייל לענדער איז דאס אנגענומען געווארן מיט דעם נאמען

אשכנז – איז א נאמען מיט וואס דייטשלאנד ווערט אנגערופן נאר אין אנזערע מקורות. די סיבה איז ווארשיינליך ווייל אשכנז איז פון די בני גומר – וואס אויף זיי זאגט די גמרא דאס פון זיי שטאמען די גערמאניער. מן-הסתם צוליב דער זעלבער סיבה זאגט אויך תרגום אויף תוגרמה אז דאס איז גרמאניע, וויבאלד אויך תוגרמה איז פון די בני גומר (ובני גומר אשכנז ריפת ותוגרמה). און אפשר איז דאס טאקע אויך די סיבה פארוואס אין דעם ספר יוסיפון העברי (פרק א') איז געשריבן אז ריפת דאס זענען די ענגלענדער (אנגלטירא), וויבאלד אויך די ענגלענדער זענען פון די גערמאנישע שבטים (זעה ווייטער). נאר מען וועט טאקע ממילא מוזן זאגן אז דאס שטיקל איז זיכער נישט געשריבן געווארן דורך יאסעפוס פלאוויוס אליין וויבאלד אין זיינע צייטן האבן נאך קיין ענגלענדער אויף דער וועלט נישט עקזיסטירט (נאר די אריגינעלע בריטן וואס האבן גערופן זייער לאנד בריטאניע – ווי איך וועל באלד אויסקלארן).

למעשה אבער, אין אלע אונזערע שפעטערע ספרים איז נישטא קיין זכר צו די אלע נעמען וואס איר רעכנט אויס פאר דייטשלאנד, דען תוגרמה איז ווי געשמועסט אויבן אינעם אשכול "געשאנקען" געווארן פאר טערקיי (ווארשיינליך צוליב דער סברא אז דער נאמען טערקיי שטאמט פון תוגרמה – וואס ווערט שוין גערופן אויף טייל פלעצער תורגמה – דער ג' נאכ'ן ר', וואס דאס איז שוין מער קרוב צו תורקמה/תורקה). און דייטשלאנד איז למעשה אנגענומען צו רופן נאר מיט דעם נאמען "אשכנז".

שוועמל פרעגט נאך:
איז דאס די זעלבע גרמניא של אדום וואס חזל רופן אן? און וואס האט עס מיט אדום.


עס איז ווארשיינליך קלאר אז די גמרא מיינט די גערמאניע וואס האבן טאקע אין יענע צייטן אנגעמאכט די חורבנות איבער דער וועלט. דער מדרש דערציילט אז יעדן טאג גייען ארויס חיילות פון דריי הונדערט פראווינצן פון גערמאניע און הארגענען זיך מיט דריי הונדערט פון די רוימער, א שטיקל בילד פון די ביטערע שלאכטן וואס זענען אנגעגאנגען. אויף דעם זאגט די גמרא אז יעקב האט מתפלל געווען דער באשעפער זאל אים נישט ארויסלאזן מער אויף א קריג ווייל דאן וועט ער איינפאך וועלן די גאנצע וועלט אונטערברענגען (אזוי-ווי עס איז ווירקליך געווען פאר זעכציג יאר צוריק, נישט מער געדאכט).

יעצט איז די פראגע, פארוואס טאקע האט מען זיי צוגעבינדן צו אדום? אדום מיינט דאך געווענליך רוים, און די רוימער זענען דווקא געווען זייערע דם-שונאים. עס איז באמת א פלא. מען קען אפשר זאגן דערויף עטליכע סברות. איינס, אז די גערמאניער האבן שוין דאן אנגעהויבן אריבערצוגיין צו קריסטנטום, און ממילא פארדינען זיי זיך דעם זעלבן נאמען וואס אלע קריסטן: אדומיים. צוויי, אז חז"ל האבן טאקע געוויסט אז זיי זענען פון די בני עשיו (לאמיר נישט פארגעסן אז פיל ספרים באטראכטן זיי אלס אייניקלעך פון עמלק – וואס ער איז דאך געווען אן אייניקל פון עשיו).

שוועמל פרעגט:
וואס איך וואלט געוואלט וויסן איז בנוגע ענגלאנד. עס ווערט אויך גערופן בריטניא, אנגליה, איריה, יונייטעד קינגדאם [דאס איז מסתם א לעצטערע מאדערנע נאמען]. צי ווערט דאס דערמאנט אין די תורה אלס לאנד אדער אלס פאלק?


פון די פריערדיגע ווערטער איבער גערמאניע איז שוין די פראגע אויך טיילווייז קלאר געווארן. אלזא, בריטאניע הייסט דאס פשוט פאר דעם ווייל די ערשטע אמאליגע איינוואוינער פון יענעם אינזל זענען געווען א פאלק אדער א שבט וואס האט זיך גערופן "בריטן". איך האב נאך קיינמאל נישט באגעגנט א מפורש אדער א תרגום וואס זאל זאגן אויף איינע פון די אומות אין דער תורה אז מען מיינט די בריטן, עס איז אבער דאך מעגליך אז דאס איז איינע פון די אומות, דען פיל פון די אלע אומות ווייסן מיר דאך ניטאמאל ווער זיי זענען (איך האב ביי מיר אין שטוב דעם ספר "די יידישע אלטערטימער" (קדמוניות היהודים) פון יאסעפוס פלאוויוס ווי ער דערמאנט פיל היינטיגע אומות אין פ' נח, איך בין אבער יעצט אין ארץ-ישראל און איך וועל מוזן ווארטן ביז'ן אהיימפארן אויף צו קענען נאכקוקן די אלע זאכן). עס איז אויך שטארק מעגליך אז די בריטן האבן זיך פיל שפעטער דארט באזעצט. למעשה דאכט זיך מיר אז קיינער ווייזט נישט אן אויף אן אומה אין דער תורה אז מען זאל מיינען די בריטן (אויך די כינעזער ווערן נישט דערמאנט, די יאפאנעזער, און די אינדיאנער, און נאך פיל).

דעם נאמען אנגליא (ענגלאנד) האט עס באקומען דעם נאמען ווען די אנגלען – איינע פון די גערמאנישע בארבארישע שבטים – האט דאס איינגענומען פון די בריטן. אויך די יוטן מיט די זאקסן (נאך צוויי גערמאנישע שבטים) האבן זיך דארט באזעצט מיט זיי. די ענגלישע שפראך איז טאקע אריגינעל א גערמאנישע שפראך וואס איז א געמיש פון די שפראכן פון די שבטים (אנגלא-זאקסן) מיט פיל לאטיינישע ווערטער פון פראנצויזיש. בקיצור, ענגלאנד הייסט דאס אויפ'ן נאמען פון די אנגלען.

אירייא איז אינטערעסאנט ווי איר האט געזעהן דעם נאמען. בכל אופן, איז דאס נישט דער נאמען פונעם גאנצן בריטישן אינזל, נאר פון אירלאנד אליין (דאס איז איינע פון די פיר לענדער וואס געפינען זיך אויף דעם בריטישן אינזל: אירלאנד, סקאטלאנד, וועלס, ענגלאנד). אין די דריי אנדערע לענדער – חוץ פון ענגלאנד – וואוינען נאך טאקע אייניקלעך פון די אלטע בריטישע שבטים, און זייער שפראך און טראדיציע איז טאקע אינגאצן אנדערש, זיי רעדן אפילו נישט קיין ענגליש, נאר זייערס אן אייגענע שפראך (איך האב מיר אלס אינגל אמאל איינגעחזר'ט פיל מאל – פון דעם אנציקלאפעדיע פאר קינדער "הארץ ומלואה" - אויף אויסנווייניג דעם נאמען פון א שטאט אין "וויילס" וואס ווערט גערופן אויף זייער שפראך - אויף "וועלש". דער נאמען צייכנט זיך אויס מיט דעם וואס דאס איז דער לענגסטער נאמען אין דער וועלט פאר א שטאט. דער נאמען איז: הְלַאנבַאירפּוּלווֶערנְדְרוֹבּוּלהְלַנטִיסִילִיאוֹגוֹגוֹגוֹח. איך מיין אז איך האב נאך אויסגעלאזט א האלבן נאמען).

יונייטעד קינגדאם איז פארשטייט זיך א נאמען אויף ענגליש וואס די ענגלענדער האבן זיך געגעבן, ווארשיינליך איז דאס געווארן ווען זיי האבן זיך אויסגעשפרייט אויף א גרויסן טייל פון דער וועלט שאפנדיג דערמיט די גרויסע בריטישע אימפעריע וואס האט איינגעשלאסן אלע פראווינצן פון פיל ווייטע ערטער וואס זענען געווען אונטער זיי. דאן איז זיי פאסיג געווען דער נאמען "די פאראייניגטע קעניגרייך" (אזוי-ווי "דער סאוויעטן פארבאנד" אין זייער צייט), מיינענדיג דערמיט אנצודייטן אויף די פילע פראווינצן וואס זענען אלע פאראייניגט אין זייער מלוכה.

אוועטאר
קרעמער
שר עשרים אלפים
תגובות: 28276
זיך איינגעשריבען אום: זונטאג יוני 25, 2006 12:34 pm

תגובהדורך קרעמער » דינסטאג אוקטובער 07, 2008 12:17 pm

אנה יכנס כל הפשתן הזה? דער איד גיסט דאך אזויפיל ידיעות חדשות אז זיי קענען זיך נישט פלאצירן אין אונזער קליין מח'ל... יישר כח מעומקא דלבא פאר אייערע הערליכע ווערק לתועלתינו.

אגב: ברבריא ווערט שוין טאקע דערמאנט אין מדרש (וואנדאלן איז ביי מיר א פרישע ידיעה).

יידישיסט
שר חמש מאות
תגובות: 609
זיך איינגעשריבען אום: מיטוואך אוגוסט 13, 2008 10:48 pm

תגובהדורך יידישיסט » דינסטאג אוקטובער 07, 2008 1:47 pm

א דאנק אייך הרב קרעמער פאר אייער חיזוק.

ברבריא וואס ווערט דערמאנט אין מדרש מיינט מען נישט די דייטשן, מען מיינט די אמאליגע איינוואוינער פון צפון-אפריקע (נעבן מאראקא) וואס האט אמאל געהייסן ברבריא, און די דארטיגע שבטים זענען אויך אנגערופן געווארן בארבארן. דער מדרש דערמאנט זיי געווענליך צוזאמען מיט "מוריטניא" (צ.ב. אז הקב"ה האט פיינט די בני ברבריא ומוריטניא שמתהלכים ערומים בשוק), וואס דאס איז א מדינה וואס גרעניצט זיך מיט מאראקא, אלזא מיינט לכאורה דער מדרש די דארטיגע ברבריא

אוועטאר
שוועמל
שר עשרת אלפים
תגובות: 14176
זיך איינגעשריבען אום: מיטוואך יולי 19, 2006 8:40 pm
לאקאציע: גידולו בכל מקום

תגובהדורך שוועמל » דינסטאג אוקטובער 07, 2008 8:29 pm

ישר כחך הרב יידישיסט !!!

...שוועמל פרעגט
...יידישיסט ענטפערט

...שוועמל פרעגט נאך
...יידישיסט ענטפערט ווייטער

די פראבלעם איז אבער, אז שוועמלס געפרעגאכצער קומען נישט צו קיין טיפה מן הים צו יידישיסט געענפעראכץ !

די לענגסט שכויח וואס גייט ברעכן היסטאריע איז הְלַאנבַאירפּוּלווֶערנְדְרוֹבּוּלהְלַנטִיסִילִיאוֹגוֹגוֹגוֹח.
(עס וועט ווערן באשריבן אין די הונדערט-יאר-ארומידיגע קרעטשמע דורך דעם נייעם יידישיסט...)
שוש אשיש בה', תגל נפשי באלקי! (ישעיה סא)

אוועטאר
שוועמל
שר עשרת אלפים
תגובות: 14176
זיך איינגעשריבען אום: מיטוואך יולי 19, 2006 8:40 pm
לאקאציע: גידולו בכל מקום

תגובהדורך שוועמל » דינסטאג אוקטובער 07, 2008 8:39 pm

יידישיסט שרייבט:
(אויך די כינעזער ווערן נישט דערמאנט, די יאפאנעזער, און די אינדיאנער, און נאך פיל).

דאס האב איך דיך אויך געוואלט טאקע פרעגן (ווילאנג די צייט איז רייף קען מען פרעגן..), מילא יאפאנעזער איז הויפטזעכליך א שבט פון די כינעזער, אבער כינע אליינס איז דאס נישט סין וואס ווערט דערמאנט אין בראשית? און פארוואס ווערט דאס אזוי גערופן אין ספרים [מזרח הרחוק בארץ סין] און להבדיל אין העברעאיש?

אינדיע איז טאקע אינטערעסאנט אז די פסוק דערמאנט עס נישט, אבער אין חזל איז זיכער דא, איך דענק נישט אויף די רגע.

(BTW, דו חזרסט כסדר דיינע קענטעניסן? אזוי פול צו געדענקן ! אסך אירע האבן שוין אלעס געליינט אבער ווי דער יש"מ פלעגט זאגן 'די עיקר איז חזרה')
שוש אשיש בה', תגל נפשי באלקי! (ישעיה סא)

אוועטאר
שוועמל
שר עשרת אלפים
תגובות: 14176
זיך איינגעשריבען אום: מיטוואך יולי 19, 2006 8:40 pm
לאקאציע: גידולו בכל מקום

תגובהדורך שוועמל » דאנארשטאג אוקטובער 09, 2008 11:02 pm

אגוטע וואך א גוט יום טוב הרב יידישיסט, און א געזונט אויסגעבעטן גליקלעך יאר.

זאגנדיג היינט די מפטיר יונה האב איך מיך פריש דערמאנט אין אייער אפהאנדלונג איבער תרשיש. אבער גרייכנדיג צום פסוק 'סוף חבוש לראשי' האב איך געזען א טייטש וואס צעווארפט רוב פון דיינע בנינים און מיר וועלן מוזן אננעמען אז תרשיש איז א ים ערגעץ אינעם אוקינוס.
אט איז וואס רש"י טייטשט בשם מדרש "ימא דסוף תלי עיל מן רישי שהראהו הקב"ה ים סוף ואיך עברו ישראל בתוכו שהיו שתי עיני הדג כמין שתי חלונות ומסתכל ורואה כל מה שבים", פשטות איז פשט אז ער האט געזען די ארט אינעם ים סוף [ביים רעד סי] וואס האט זיך געשפאלטן ווען די אידן זענען אריבער דעם ים סוף דארט.

קארטאגאו און היספאניע ביידע געפונען זיך אינעם מיטעללענדישן ים, צפון פונעם ים סוף מיט א ריזיגער הפסק פון לאנד, קיין סועץ קאנאל איז נאך דאן נישט געווען פון וואו דער פיש האט געקענט אריבערשווימען פונעם ים התיכון צום ים סוף. בע"כ מוז זיין ער האט געוואלט אנטלויפן קיין תרשיש ערגעץ א פלאץ אדער ים צו מזרח אפריקע אדער גאר אזיע דורכן נעמען דעם וועג צו דרום פונעם ים סוף.

ווידער אויב איז דאס געווען א רוחניותדיגע ראיה, דאן וואס האט אויסגעפעלט די שני עיני הדג כמין חלונות?

די איינציגסטע קשיא וואס איך האב איז דער דריטער פסוק וואס שטייט קלאר אז ער האט גענומען דעם שיף פון יפו וואס איז דאס זיכער ביים מיטללענדישן ים ?
חוץ אויב מיר לערנען פשט אין מדרש אז דער פיש האט געהאט קפיצת הדרך און ארומגעשווימען גאנץ אפריקע פון יפו ביזן ים סוף אין בלויזע דריי טעג, אזאך וואס איז בדרך הטבע נישט מעגליך פארן שנעלסטן שווימענדען פיש.


"אין המדרש הזה אומר אלא דרשוני".
שוש אשיש בה', תגל נפשי באלקי! (ישעיה סא)

יידישיסט
שר חמש מאות
תגובות: 609
זיך איינגעשריבען אום: מיטוואך אוגוסט 13, 2008 10:48 pm

תגובהדורך יידישיסט » מאנטאג אוקטובער 27, 2008 5:11 am

שוועמל פרעגט:
דאס האב איך דיך אויך געוואלט טאקע פרעגן (ווילאנג די צייט איז רייף קען מען פרעגן..), מילא יאפאנעזער איז הויפטזעכליך א שבט פון די כינעזער, אבער כינע אליינס איז דאס נישט סין וואס ווערט דערמאנט אין בראשית? און פארוואס ווערט דאס אזוי גערופן אין ספרים [מזרח הרחוק בארץ סין] און להבדיל אין העברעאיש?


אין די ספרים ווערט עס אזוי גערופן וויבאלד עס איז אזוי אויף אראביש, און פון דארט נעמט זיך דאס צו רופן אויף העברעאיש אזוי. אין דער תורה איז דאך סין א נרדף צו סיני (מדבר סין, אדער צין), און מען מיינט גאר דעם מדבר ווי די אידן האבן זיך געדרייט.

און אויך דער "סִינִי" וואס דערמאנט אין פ' נח זעהט נישט אויס צו זיין אן אומה אין דער ווייטער אזיע, דען דארט ווערן באהאנדלט די בני כנען וואס אלע האבן זיך פלאצירט דארט אין דער געגנט, איז וויזשע זאל סין פלוצלונג מיינען כינע? איך מיין אז עס איז נישטא קיינער וואס זאל אזוי מפרש זיין. רב סעדיה גאון טייטשט דאס אויף א פלאץ אין סיריע (און אויף תובל טייטשט ער "אלצין", אבער לויט ווי דער מו"ל צייכנט צו פון אונטן מיינט ער ביי דעם אויך א געגנט אין אראביע).

הרב שוועמל ערווענט נאך:
אינדיע איז טאקע אינטערעסאנט אז די פסוק דערמאנט עס נישט, אבער אין חזל איז זיכער דא, איך דענק נישט אויף די רגע.


נישט נאר חזל נאר דער פסוק דערמאנט דאך דאס אויך אלס "הודו" אין מגילת אסתר. איך האב נאר געמיינט צו זאגן אז דאס ווערט נישט דערמאנט ביי דער "התפלגות האומות" אין פ' נח, און עכ"פ אין דער גאנצער תורה. אייגנטליך, לויט איינעם פון די מפרשים איז דאס לאנד "חוילה" אין פ' בראשית גאר אינדיע (ווי דערמאנט אויבן אינעם שמועס וועגן "הודו" מיט "כוש"). תרגום יונתן אויף "חוילה" אין פ' בראשית איז "ארע הינדיקי".

BTW, דו חזרסט כסדר דיינע קענטעניסן? אזוי פול צו געדענקן !


טייערער הרב שוועמל, א שיינעם דאנק פאר אייערע קאמפלימענטן. איך געדענק וואס עס איז מיר אינטערעסאנט, און וואס עס איז מיר אינטערעסאנט חזר איך. איך געדענק נישט גענוי וואס איך חזר און וואס נישט. למעשה קומט ממילא אויס ווען מ'ליינט אסאך אז מען שטויסט זיך אהן פיל מאל אין די זעלבע זאכן און עס ווערט ממילא איבערגעחזר'ט (ווי צ.ב. טאקע מיט קארטהאגא וואס מען באגעגנט אין היסטאריע אלס זייער היסטארישער קריג מיט רוים, איך האב דאס אויך געטראפן אין דעם "ספר יוסיפון העברי" פרק כ"ג ווי ער רופט אן קארטהאגא מיט'ן נאמען "קרטגינה" אזוי-ווי די גמרא רופט דאס אהן, און דאס איז דאכט זיך טאקע דער אריגינעלער לאטיינישער נאמען פאר קארטהאגא. און דעם קריגס-פירער חניבעל רופט ער אויף זיין לאטיינישן נאמען אַנִיבַּל [HANIBAL], און זיין ברודער עשתרות-בעל רופט ער אסדרובל. ווי געזאגט שטויסט מען זיך אהן אין קארטהאגא אויך אין דער גמרא, און להבדיל אויך אין דער רוימישער מיטהאלאגיע ווי עס ווערט דערציילט וועגן אינעאס א העלד פון טרויע וואס איז אנטלאפן קיין קארטהאגא - נאך דעם גרויסן טרויאנישן קריג, באקאנט אלס די איליאידע וואס האמירוס האט אפגעשריבן - און האט זיך באפריינדעט מיט דידו די גרינדערין פון קארטהאגא. עס ווערט דערמאנט אין דער שפאנישער היסטאריע, אין דער צפון-אפריקאנער היסטאריע, נאכאמאל און נאכאמאל). פארשטייט זיך אליין אז דער לאנגער נאמען פון דער שטאט אין וועלס האב איך איבערגעחזרט כאטש אזויפיל מאל וויפיל אותיות דאס האט :roll: . נישט געדאגה'ט איך בין נישט אזוי משוגע היינט, איך האב דאס געטון אלס קינד האבנדיג דאס אלס האבי צו געדענקען דווקא אזא לאנגן מאדנעם נאמען. למעשה אבער האב איך מיך טאקע טועה געווען, און דער נאמען איז באמת נאך לענגער: הְלַאנבַאירפּוּלהְגְווינגילווֶערנְדְרוֹבּוּלהְלַנטִיסִילִיאוֹגוֹגוֹגוֹח. זעהסטו טאקע אז מען דארף מער חזר'ן.

יידישיסט
שר חמש מאות
תגובות: 609
זיך איינגעשריבען אום: מיטוואך אוגוסט 13, 2008 10:48 pm

תגובהדורך יידישיסט » דינסטאג נובעמבער 04, 2008 3:47 pm

שוועמל האט געשריבן:
זאגנדיג היינט די מפטיר יונה האב איך מיך פריש דערמאנט אין אייער אפהאנדלונג איבער תרשיש. אבער גרייכנדיג צום פסוק 'סוף חבוש לראשי' האב איך געזען א טייטש וואס צעווארפט רוב פון דיינע בנינים און מיר וועלן מוזן אננעמען אז תרשיש איז א ים ערגעץ אינעם אוקינוס.


וואס פלוצלונג לויפט איר צום אקעאנוס? עס וועט אייך עפעס העלפן? איר קענט דאך פאר דעם געלט זאגן אז תרשיש איז ערגעץ אינעם ים-סוף, אדער אינעם אראבישן ים, נעבן דעם גאלף פון עדן. איר וואלט נישט געמוזט אראפקריכן אזוי ווייט ווי ביז דעם אינדישן אקעאן.

יעדנפאל, איר פרעגט באמת גאר א שטארקע קשיא. דער תרגום דארט (און רש"י איז עס מבאר) טייטשט אויף "סוף חבוש לראשי" - "ימא דסוף תלי עייל מרישי" - אז דער ים סוף איז איבער מיין קאפ. יעצט ווי קומט תרשיש צום ים-סוף? איר אליין (אנטשולדיגט, איך האב פארגעסן אז דיר געפעלט בעסער אז מען ווענדט זיך צו דיר בלשון נוכח-יחיד...) שרייבט דאך אבער אויך אז די קשיא איז שווער אפילו אן דעם "תרשיש - אפריקע", דען אין פסוק שטייט דאך קלאר אז ער איז ארויסגעפארן פון יפו. ממילא איז די קשיא נישט קעגן די אויבנדערמאנטע פירושים אין קארטהאגא, און עס וועט אויך נישט צו-ווארפן זייערע בנינים, נאר עס איז פשוט שווער - און זייער שווער - פשט אינעם פסוק אליין אויב מיר טייטשן "סוף" אלס דעם ים-סוף (רוב מפרשים טייטשן נישט אזוי).

אינעם מלבי"ם זעהט מען ווי ער פרובט מיישב צו זיין דעם תרגום אז ער זאל גאר נישט מיינען דעם באקאנטן ים-סוף. ווי פאלגנד איז דאס לשון פונעם מלבי"ם: ים סוף - הוא המים שלמעלה מן התהום שנקרא בשם סוף (כי הדג הוליכו דרך ים סוף שמשם הוליכו לננוה), היה חבוש לראשי - כי היה הים למעלה מראשו אחר שהוא היה בתהום רבה. עכ"ל.

זיין לשון אין דעם ארומגערינגעלטן איז גאנץ אומפארשטענדליך, אבער בפשטות פון דעם וואס ער איז מבאר פריער ווייזט אויס אז ער ערקלערט אז דער אויבערער חלק פונעם ים הייסט "סוף" (און דער פיש וואס איז דאן געווען טיף אינעם וואסער האט שפעטער געדארפט ארויסקומען צום אויבערפלאך כדי אים אריינצופירן קיין ננוה), און דערווייל איז דאס וואסער געווען איבער אים, און ער איז געווען גאר טיף אינעם תהום [קען זיין אז דאס ארומגערינגעלטע האט אן אנדערן פשט, ווייל עס קוקט אויס גאר אומפארשטענדליך, אבער עכ"פ די איבריגע ווערטער פונעם מלבי"ם זענען גאנץ קלאר - ווי געזאגט].

למעשה דער פשט פונעם מלבי"ם קען טאקע זיין גוט אינעם תרגום וואס זאגט נישט מער ווערטער, אבער אין רש"י וואס ברענגט נאך צו א קלארן מדרש וועגן דעם מקום הנס וואס יונה האט געזעהן, דאס מאכט די זאך קלאר נאך שווערער, אז דער ים-סוף מיינט טאקע "דעם רויטן ים".

מיר זעהען טאקע ווי עטליכע מפרשים מוטשען זיך אויף דעם. דער רד"ק זאגט "ויש מפרשים סוף - ים סוף, ואומרים כי ים-סוף הוא נכנס בים יפו ועל הדרך הזה ת"י ימא דסוף תלי עיל מן רישי" עכ"ל. ענליך צו דעם זאגט דער אברבנאל: "ויונתן תרגם סוף על ים-סוף. אולי שהיה מתערב עם ים יפו שמה". עכ"ל.

דאכט זיך מיר אז דער תירוץ פון די מפרשים מאכט נאר דעם פלא גרעסער ווייל זיי זענען מעלה א השערה אז דער ים-סוף האט זיך אפשר ערגעץ באגעגנט מיט'ן ים התיכון. נו, ווי קען דאס זיין, דאס שטימט דאך איבערהויפט נישט מיט דער מאפע.

יידישיסט
שר חמש מאות
תגובות: 609
זיך איינגעשריבען אום: מיטוואך אוגוסט 13, 2008 10:48 pm

תגובהדורך יידישיסט » דינסטאג נובעמבער 04, 2008 3:49 pm

אינטערעסאנט איז אז אן ענליכער פראבלעם האט זיך געמאכט אויך אין ספר דברי הימים און מלכים ווי עס ווערט געשמועסט וועגן תרשיש, און דארט שטייט אז די שיפן זענען ארויסגעפארן פון "עציון גבר", און דאס איז דאך ווי באקאנט א פּאָרטשטאט אין דרום א"י (אדום אמאל) וואס זיצט אויפ'ן ים-סוף. יעצט, ווי קומט דאס אז מען זאל ארויסשיקן שיפן קיין תרשיש פון עציון גבר, דעם ים-סופ'ישער פארט.

דערויף איז פארהאן אן אברבאל וואס וויל טענה'ן אז מען האט נישט געוואלט פארן קיין תרשיש פון עציון גבר, נאר מען האט גענוצט שיפן וואס הייסן "אניות תרשיש" וואס דאס איז א סארט שיף, און מען האט געוואלט פארן דערמיט נאר קיין אופיר (וואס איז ווארשיינליך אין דער געגנט פון דרום-מזרח אפריקע). דער מלבי"ם פארשווייגט אבער דעם אברבנאל טענהנ'דיג אז פונעם פסוק אין דברי-הימים איז קלאר אז די שיפן האבן זיך געווענדעט אויך קיין תרשיש. דעריבער טייטשט ער אז "תרשיש" מיינט א שטאט אין שפאניע און נישט קארטהאגא, און מיט דעם זאגט ער איז די זאך מיושב. למעשה זענען די ווערטער פונעם מלבי"ם אויך א מדרש פליאה וויבאלד אויך שפאניע זיצט נישט ביים ים-סוף, עס זיצט דאך ביי גאנץ אן אנדערן ים. נו, עס איז טאקע מעגליך צו פארן מיט א שיף דורכ'ן ים-סוף ביז שפאניע – אויב מ'רינגלט ארום אפריקע, אבער פאר דעם געלט קען מען פונקט אזוי פארן קיין קארטאגא (אפשר אביסל ווייטער), אזוי צו אזוי איז דאס זייער א מאדנער וועג, וויבאלד מען קען נעמען א שיף דירעקט פון יפו קיין קארטאגא אדער שפאניע. איז וואס האט אויפגעטון דער מלבי"ם מיט'ן מחדש זיין אז תרשיש איז שפאניע און נישט קארטאגא?

ווי פאלגנד איז דאס לשון פונעם מלבי"ם אין ספר מלכים א' (י, כ"ב,) וועגן דעם ענין:
כי אני תרשיש, הרב יצחק אברבנאל חשב כי תרשיש היא העיר קארטאגא בצפון אפריקא על יד ים התיכון, ועל ידי כן הרבה לתמוה איך הלכו אניות מעציון גבר שהוא על שפת ים סוף – לתרשיש, והלא רצועת המדבר (ארץ זיעץ) מבדלת בין ים סוף לים התיכון ורצה לדחוק שנקראו אניות תרשיש על שם צורתם שנעשו כתבנית האניות האלה, אבל עמד לנגדו מ"ש בדברי הימים (ב' כ' ל"ז) ויחברהו עמו לעשות אניות ללכת תרשיש ויעשו אניות בעציון גבר, ואיך הלכו מעציון גבר לתרשיש, והפליאה הזאת מלאה את לבבו לאמר שעזרא הסופר טעה במ"ש ביהושפט (מלכים א' כ"ב י"ט) שעשה אניות תרשיש ללכת אופירה, וטעה שרצה לומר אניות ללכת תרשיש עיי"ש. וחלילה לנו מזה הדעת שנאמר שכותב דברי הימים טעה, ושלא ידע פשט הכתוב במלכים ולא ידע שא"א ללכת מעציון גבר לתרשיש באניה, אבל האמת עד כמו שפירשתי בפי' ישעיה (סי' כ"ג) שתרשיש היא עיר טארזיס שהיא שפאניען הקדומה שהיתה רוכלת הצוריין בספרד, כמו שכתבו חכמי העמים, ונודע כי הצוריים בבואם לספרד (אשר כינו בשם אושפניא על שם שהשפנים נמצאים שם לרוב) מצאו כסף מזוקק על פני הארץ הרבה מאד עד שעשו כל כליהם וגם חשוקי ווי ספינותיהם מכסף, ובנו להם שם עיר מושב ורוכלת העמים טערזוס, והעיר הזאת יושבת על מבואת ים האטלאנטי שהוא ים אקיאנוס, וידוע שים סוף נכנס לים אקינוס, ולפ"ז באניות שבנה בעציון גבר היה יכול לילך בין לאופיר בין לתרשיש (די שאלה איז יעצט ווי גענוי איז אופיר לויט'ן מלבי"ם).

ווי געזאגט, איז לכאורה אינגאנצן אומפארשטענדליך וואס דער מלבי"ם האט אויפגעטון וויבאלד כאטש טאקע דער ים-סוף פאלט אריין אינעם אקעאן, איז דאך דאס גאנץ אן אנדערער אקעאן. דער ים-סוף פאלט אריין אינעם אינדישן אקעאן בעת שפאניע געפינט זיך אויפ'ן אטלאנטישן אקעאן. און אויב איז עס שוין פארשטענדליך נאר צוליב דעם וואס זיי זענען למעשה איין באהאפטענער ים, נו, אויב אזוי איז דאך דער מיטללענדישער ים אויך גוט, וויבאלד דאס באהעפט זיך אויך מיט'ן אקעאן.

אוועטאר
מיללער
שר עשרים אלפים
תגובות: 25031
זיך איינגעשריבען אום: דאנארשטאג יוני 14, 2007 9:48 am

תגובהדורך מיללער » מאנטאג אוגוסט 17, 2009 12:45 am

יידישיסט האט געשריבן:מיט "תרשיש" איז די זאך גאנץ קאמפליצירט, הרב מיללער אליין האט שוין צוגעוויזן א טייל פון די פראבלעמען, איך האב נישט אנגעיאגט צו באטראכטן זיינע לינקס אבער עס קוקט אויס ווי פיינע זאכן, מעגליך אז מען קען פון דארט צוקומען צו א מהלך. איך האב שוין למעשה אויסגעארבעט א מהלך מיט עטליכע יאר צוריק אויף דעם ענין און איך וועל עס דא איבערשרייבן בקיצור.

(תרשיש אלס טאראסאס אין קליין-אזיען)
אגב, דער קריסטליכער אַפּאָסטאָל (שליח) סט. פאולוס וואס מיר רופן אים שאול מתרשיש (אדער שאול התרסי), מיינט מען נישט ביי דעם אונזער תרשיש, נאר מען מיינט די שטאט "טאַראַסאָס" וואס געפינט זיך אין קליין-אזיען (היינט אין טערקיי). און אייגנטליך, דער תרגום יונתן אין פ' נח טייטשט טאקע אזוי אינעם פסוק אז "תרשיש" מיינט די שטאט טַרַסַס. ווי אויך אויפ'ן פסוק אין תהלים (קאפיטל מה, פסוק ח,) "ברוח קדים תשבר אניות תרשיש" וואס מיר זאגן יעדן מאנטאג ביים "שיר של יום", טייטשט דער תרגום: אִלְפַיָא דְטַרְסִיס (דארט איז מער מסתבר מ'זאל טאקע מיינען ערגעץ אין אייראפע, וויבאלד אפריקע האט גאר קיין שייכות נישט געהאט מיט די בני יון, און דער תרשיש אין פ' נח איז דאך אן אומה פון די בני-יון. מיט'ן זאגן אז דאס איז טאראסאס שטימט דאס זייער פיין וויבאלד עס איז באקאנט אז די יוונים האבן אמאל באזעצט קליין-אזיען).


אין די לעצטע נאמבער פון די פאפולערע 'משפחה' מאגאזין (ענגלישע) איז פארהאן גאר אן אינטערעסאנטער באשרייבונג פון א געוויסען יצחק כרמלי וועלכער איז אראפגעפארען קיין סארדיניע, איטאליע וועלכע איז די צווייט-גרעסטע אינזל אויפן מיטללענדישען ים און באלאנגט פאר איטאליע, און איז אנגעבליך די דערמאנטע 'טאראסאס'.

דער באזוך איז אים געווען זייער פארדרוסליך נאכדעם וואס טעלעפאניש האט אים דער ארטיגער קאטוילישער ארכי-בישאף געזאלט צייגען היסטארישע אידישע איבערבלייבענישען אין די אונטערערדישע ארכילאגישע טונעלן און היילען, אבער אנקומענדיג אהין האט דער דערמאנטער בישאף געצויגען מיט די אקסלען אז די טונעלן זענען די אייגנטומען פון די וואטיקאן אין רוים און נאר מיט זייער שריפטליכע צושטימונג קענען זיי געוויזען ווערן פאר טוריסטען, און פארשטייט זיך דאס ברויך געדויערן גענוג לאנג אז דער כרמלי זאל דאס שוין נישט באווייזן אין דעם באזוך.

דארט אינעם אינזל וואונען דריי אידישע פאמיליעס היינט צוטאגס מיט די 'אביבי' פאמיליע די איינציגסטע רעליגיעזע וועלכע זענען אפיליאירט מיט די אידישע קהילה אינעם היסטארישען איטאליענער שטאט 'ליווארני', דער פאמיליע הויפט לוי אביבי איז געווען אינסטרומענטאל אריבערצופירען דאס געביין פונעם הייליגען חיד"א פון ליווארני ווי דער חיד"א האט געוואונט קיין ארץ ישראל.

אנגעבליך, איז אויפן דערמאנטן אינזל געווען אמאל א שפרידלענדע אידישע געזעלשאפט מיט אזויפיל ווי צען פראצענט פון די ארטיגע באפעלקערונג, אבער די היינטיגע הערשאפט איז אויסן אפצושאפן יעדן זכר פונעם אידישען עבר.

יידישיסט
שר חמש מאות
תגובות: 609
זיך איינגעשריבען אום: מיטוואך אוגוסט 13, 2008 10:48 pm

תגובהדורך יידישיסט » מאנטאג אוגוסט 17, 2009 9:14 pm

אינטערעסאנט. איך האב נאך קיינמאל נישט געזען א מיינונג אז תרשיש זאל האבן שייכות מיט סארדיניע. דער "טאראסאס" וואס איך האב דערמאנט איז א שטאט וואס געפינט זיך אין קליין-אזיען, וואס איז אין היינט אינעם שטח פון טערקיי. דאס איז נישט אויף אן אינזל.

אוועטאר
מיללער
שר עשרים אלפים
תגובות: 25031
זיך איינגעשריבען אום: דאנארשטאג יוני 14, 2007 9:48 am

תגובהדורך מיללער » מאנטאג אוגוסט 17, 2009 10:41 pm

איך האב מיך לגמרי נישט גערישט צו טרעפן אזא סורפרייז! ברוך הבא הער יידישיסט, מיר האבן שוין כמעט אויפגעגעבן האפענונג אייך צו זעהן, עס איז אונז באמת א שמחה, ברוך שובך!

אויב האט מיין תגובה באשטייערט אייער אומקער, פריידט עס מיר אז איך האב דערין א חלק, לאמיר האפן אז דאס איז נישט נאר בדרך עראי.

אוועטאר
farshlufen
שר עשרת אלפים
תגובות: 19273
זיך איינגעשריבען אום: פרייטאג נובעמבער 16, 2007 8:26 am
לאקאציע: אויף די פאליצעס אין ספרים שאנק

תגובהדורך farshlufen » דינסטאג אוגוסט 18, 2009 7:39 am

מיללער האט געשריבן:איך האב מיך לגמרי נישט גערישט צו טרעפן אזא סורפרייז! ברוך הבא הער יידישיסט, , עס איז אונז באמת א שמחה, ברוך שובך!
סימן דלא ידע כלום, שבוחי.

יידישיסט
שר חמש מאות
תגובות: 609
זיך איינגעשריבען אום: מיטוואך אוגוסט 13, 2008 10:48 pm

תגובהדורך יידישיסט » מיטוואך אוגוסט 19, 2009 10:52 pm

א דאנק פאר דעם "ברוך הבא". עס גיט א גוט געפיל צו זען אז מען האט נישט פארגעסן פון מיר. איך פרואוו כסדר צו היטן אויף א פארבינדונג מיט דער קרעטשמע, ווי ווייט די צייט ערלויבט מיר.

שטארק זיך
שר ששת אלפים
תגובות: 6091
זיך איינגעשריבען אום: דינסטאג יולי 28, 2009 8:23 pm
לאקאציע: וואו דער מח איז

תגובהדורך שטארק זיך » מאנטאג פאברואר 06, 2012 12:14 am

הוי מי יתן לנו ירחי קדם...

יישר כח הארר מיללער פארן צוצייכענען אט דעם וואונדערבארן אשכול.
זאג מיר: סי-נארמאל!? (בנעימת מונח רביע, באקצענט ירושלמי)

אוועטאר
מיללער
שר עשרים אלפים
תגובות: 25031
זיך איינגעשריבען אום: דאנארשטאג יוני 14, 2007 9:48 am

תגובהדורך מיללער » זונטאג דעצמבער 07, 2014 8:27 pm

יידישיסט האט געשריבן:א דאנק אייך הרב קרעמער פאר אייער חיזוק.

ברבריא וואס ווערט דערמאנט אין מדרש מיינט מען נישט די דייטשן, מען מיינט די אמאליגע איינוואוינער פון צפון-אפריקע (נעבן מאראקא) וואס האט אמאל געהייסן ברבריא, און די דארטיגע שבטים זענען אויך אנגערופן געווארן בארבארן. דער מדרש דערמאנט זיי געווענליך צוזאמען מיט "מוריטניא" (צ.ב. אז הקב"ה האט פיינט די בני ברבריא ומוריטניא שמתהלכים ערומים בשוק), וואס דאס איז א מדינה וואס גרעניצט זיך מיט מאראקא, אלזא מיינט לכאורה דער מדרש די דארטיגע ברבריא

יבמות סג: בגוי נבל אכעיסם במתניתא תנא אלו אנשי ברבריא ואנשי מרטנאי שמהלכין ערומים בשוק, שאין לך משוקץ ומתועב לפני המקום יותר ממי שמהלך בשוק ערום.

נאך א מזל מיר האבן געהאט אמאל דא דעם חכם הרזים יידישיסט, בין איך געווען אינדערהיים ביים באגעגענען דעם מאמר חז"ל

יישר כח אייך, שלא בעלמא הדין

פאמיליעמירעלס
שר האלף
תגובות: 1162
זיך איינגעשריבען אום: דאנארשטאג אוגוסט 30, 2012 2:31 am

תגובהדורך פאמיליעמירעלס » זונטאג דעצמבער 07, 2014 9:08 pm

ברבריא געדענק איך איז ליביע

אפטימיסט
שר האלף
תגובות: 1154
זיך איינגעשריבען אום: מאנטאג אוקטובער 15, 2012 10:51 pm

תגובהדורך אפטימיסט » דאנארשטאג מאי 31, 2018 2:44 am

הערליכע אשכול! מלא וגדוש! איך האב עס זייער געגליכן און ארויסגעפרינט דאס גאנצע אשכול; א שאד עס האט זיך דא אפגעשטעלט.

דערבארומדיג'ער
שר חמישים ומאתים
תגובות: 354
זיך איינגעשריבען אום: דאנארשטאג יוני 22, 2017 12:04 pm

תגובהדורך דערבארומדיג'ער » דאנארשטאג מאי 31, 2018 3:25 pm

אפטימיסט האט געשריבן:הערליכע אשכול! מלא וגדוש! איך האב עס זייער געגליכן און ארויסגעפרינט דאס גאנצע אשכול; א שאד עס האט זיך דא אפגעשטעלט.

נאך א מזל אז די האסט עס ארויפגעברענגט, עס איז מיר געוואלדיג צינוצגעקומען איצטערט.
געוואלדיגער אשכול

דערבארומדיג'ער
שר חמישים ומאתים
תגובות: 354
זיך איינגעשריבען אום: דאנארשטאג יוני 22, 2017 12:04 pm

תגובהדורך דערבארומדיג'ער » דאנארשטאג מאי 31, 2018 3:50 pm

scy4851 האט געשריבן:איכה קאפיטעל ד' פסוק כ"א
שישי ושמחי בת אדום יושבת בארץ עוץ גם עליך תעבר כוס תשכרי ותתערי.
און תרגום דארט איז עפעס איינגערינגעלט [און מיין חומש עט ליסט]
בת"ק הגירסא חדיאי ובדותי קרתא דמתבניא בארע ארמניאה

מיינט דאס טאקע Armenia . ?

און איוב דער ערשטע פסוק
איש היה בארץ עוץ
זאגען ביידע רש"י מיטען מצודות אז עוץ איז בארץ ארם אלטס עוץ בן נחור
קען זיין אז ארם איז דאס זעלבע וויא ארמניאה?

דער אבן עזרא זאגט אבער אויף איוב 'שהיה מבני עשו, והענין מוכיח בארץ עוץ כמו שישי ושמחי בת אדום יושבת בארץ עוץ.
ער באצירט זיך אויף די ווערטער בת אדום יושבת בארץ עוץ


הרב יידישיסט איך וואלט זייער געוואלט הערען אייער מיינונג דערויף.

יידישיסט האט געשריבן:
קרעמער האט געשריבן:
אגב, מען זאגט אז די ארמענער זענען די ריכטיגע עמלקים.


געוואלדיג! איך האב - ווי געזאגט פריער - געטראפן אינטערעסאנטע מקורות וועגן דעם ענין וועגן עדות פון יענע אידן אויף יענעם פלאץ און וועגן מנהגים פון גויים דארט וואס צייגן אויף דעם. איך בין יעצט נישט ביי מיר אין שטוב אז איך זאל עס קענען ציטירן, איך וועל עס משלים זיין בלי"נ נאך שבת.


אויב איז די אויבנדערמאנטע אמת, דאן איז נתקיים געווארן דער "גם עליך תעבר כוס תשכרי ותתערי" בערך און די צייטן פונעם ערשטען וועלט מלחמה. די טערקישער אויטאנאמישער הערשאפט האט דא אנגעפירט מיט א סיסטעמאטישער פארטיליגונג פונעם ארמעניער פאלק, א נייער ווארט איז באשאפן געווארן אינעם ענגלישן לעקסיקאן (Genocide) כדאי צי קענען געבן א גענויער דעסקריפציע אויף די סארט פארטיליגונג...

פעניאק
אנשי שלומינו
תגובות: 2
זיך איינגעשריבען אום: מיטוואך יוני 13, 2018 4:42 pm

תגובהדורך פעניאק » דאנארשטאג יוני 14, 2018 3:50 pm

יעצט געליינט די אשכול מתחילתה עד סופה... האפלע וואפעלע...זייער רייך
א שאד יודדישיסט שרייבט מער נישט...

פעניאק
אנשי שלומינו
תגובות: 2
זיך איינגעשריבען אום: מיטוואך יוני 13, 2018 4:42 pm

תגובהדורך פעניאק » דאנארשטאג יוני 14, 2018 4:06 pm

די געארמעניער זענען געקומען פון די צפון לענדער הנקרא ׳scandinavia׳ וואס נעמט אריין ׳פונלאנד׳ ׳שוועדן׳ ׳נארוועגיע׳ ׳אייסלאנד׳ און ׳דענמארק׳....

ווייסט איינער צו די פוילישע שטאמען אויך פון די געארמעניער ? אדער זענען זיי פון די באלטיקס ,Estonia, Latvia, Lithuania ?....


צוריק צו “שפראך, גראמאטיק און דקדוק”

ווער איז אונליין

באנוצערס וואס דרייען זיך דא: נישטא קיין איינגעשריבענע באנוצערס און 2 געסט